Challenging God في تحدي مع الله
الحقيقة المره ديه قررت أكتب بالعربي, ليه؟ علشان أكبر عدد من القراء العرب يقرأوا ويشاركوني أرآهم والحقيقة الإسم ده جي من مُعاناه حقيقية ناس كتير بتمر بيها في مجتمعاتنا المتدينه بطبعها(ضحكة ساخرة)
في تحدي كده الناس داخلاه مع المنظومة الطبيعية, وطبعا انت لما بتدخل تحدي مع منظومة بالتبعية انت داخل في تحدي مع صانع المنظومة بشكل أو بآخر بوعي أو لا وعي بس النتيجة واحدة وكمان الدوافع أو الرؤيه للمنظومة ديه بتبقى رؤية دونية أو جايه من عدم إحترام لهذه الرؤيا, أعتقد كده وضحت جوهر الموضوع اللي هتكلم عنه.
وأنا طبعا بتكلم من خلال تجارب شخصية محلية مع معرفتي بما يدور في العالم الخارجي, بس بما اني من المؤمنين إنه التغيير بيحصل في دوائر صغيرة متفقه على مبدأ واحد وفكره واحده فا الحقيقة مش بشغل بالي بالعالم الخارجي.
طيب أنا كل سنه بزرع أكتر من شجرة علشان عندي اعتقاد انه ممكن ده يساعد بشكل بسيط في مواجهة التغيير المناخي اللي إحنا تسببنا فيه وبنزيده سوء لأنه كل واحد بيفكر في عدد السنين القليلة اللي عايشها على الأرض, حتى أطفاله مش بيشغلوا باله الحقيقة, المهم تلاقي انت مقابل كل شجرة بتزرعها حد جاهل أو مؤسسة حكومية فاسده تنزل تقطع الأشجار بشكل عشوائي, طيب هو حضرتك عارف إن الأشجار ديه هي الرئتين بتوع الأرض, حضرتك مدرك لما بتشيل المساحات الخضرا الجوده بتاعت الهوا اللي بتتنفسه عامله إزاي.
ندخل على الكلاب وظاهرة انتشار الكلاب الضالة زي ما بيقولوا دلوقتي, ما هو ده الترند اليومين دول ما هو احنا خلصنا على الشجر ندخل على الحيوانات, طيب نرجع نسأل سؤال تاني حضرتك بترمي زبالتك في الشارع ليه؟ ليه مش بتحافظ على نظاقة مكانك وبلدك وشوارعك؟ طيب تفتكر لو مافيش زبالة في الشارع هيبقى في أعداد الكلاب الرهيبة زي ما بتقولوا كده؟ طيب لو الكلاب والقطط دول مش موجودين زبالتك ديه هيحصل فيها ايه؟ هل انت قبل ما تقرر تقتل كلاب وقطط الشارع فكرت في خط الحماية الطبيعية اللي هما موفرينه؟ فكرت إنه ربنا لم يخلق شيئا عبثا؟ فكرت إنك بتتحدى الخالق والمنظومة شديدة الدقة اللي سبحانه وفرها لنا؟ بقتل كل شئ.
هل سيادتك بتحب ولادك؟ هل سيادتك تعرف ربنا؟ هل سيادتك بتتفكر في خلق الله؟ أسئلة كتير كل حد في مجتمعنا لازم يسألها لنفسه الغني قبل الفقير الحقيقة علشان في هذه الأيام وهذا الزمن من يدعون المعرفة والرقي يمارسون أسوء مماؤسات تتعارض مع المنهج العلمي والإنسانية.
والحقيقي المجتمعات المدنية الأصيلة هي اللي بتقوم بحرب شديدة في مقاومة جهل وفساد وأمراض مجتمعية رهيبة في دوائر صغيرة في محاولة يائسة لإصلاح ما يمكن إصلاحه.
فكر كويس قبل ما تقطع شجرة وقبل ما تقتل حيوان وقبل ما ترمي زبالتك في الشارع في عواقب كل فعل منهم.
أرجو إنه العنوان يكون شرح نفسه وممكن نتكلم في حاجات كلها ليها علاقة بالطبيعة والدورة الحياتية السليمة وأساسيتها لو عندكم من سعة الصدر والرغبة في المعرفة والتغيير.
عمتم مساءً.
مقال أكثر من رائع لخص الحالة التى نعيشها و يستحق كل التقدير والاحترام
ReplyDelete