أستاذ صلاح وحكاية كلب

 

أستاذ صلاح الشخص البسيط اللي النهارده خلاني أحس براحه وطمأنينه

إمبارح كان فيه فيديو بيتكلم عن أكل كلاب الشوارع، وأنه في شركات بتصطادهم وتدبحهم وتبيعهم مفروم، المهم أستاذ صلاح  الجميل كتب تعليق على الفيديو بيطلب من صاحب الفيديو أنه يساعده في حالة كلب هو بيراعيه، الكلب جاله صرع من سنه وكل كام يوم تجيله نوبة تشنجات، وهو مش عارف يعمل ايه 

أستاذ صلاح راجل فواعلي بيشتغل باليوميه وعايش في أوضه

انا بعت لأستاذ صلاح علشان لو محتاج علاج علشان انا كان عندي بيلا عندها صرع ولما ماتت دواها موجود واحب اساعد لو هو اللي محتاجه علاج

أستاذ صلاح بعت لي رقمه وطلب مني أكلمه

أستاذ صلاح ربى الكلب ده من وهو جرو صغير وكمان عالجه بعد ما اتعض من كلب بيتبول وبعد ما رجله بقت تمام سواق عدى عليه بعربيته، كل ده وأستاذ صلاح ما ملش ولا تعب بل عمل اللي يقدر عليه

هو رجل بسيط بيشتغل فواعلي باليوميه، يعني اليوم اللي ما ينزلش فيه مافيهوش فلوس ولكن بالرغم من ذلك إلا أنه رفض ضغط المجتمع عليه ومحاولة إجباره برمي الكلب في مكان بعيد وما نزلش شغل علشان خاف الناس تإذي الكلب وهو مش معاه  فلوس يأكل حتى

أستاذ صلاح قالي يا أستاذه أنا هيعز عليه فراقه بس مصلحته أهم، عايز حد يراعي ربنا فيه ويعيش حياه فيها أمان علشان اللي انا فيه ده مش عيشة، أصل اي حيوان مش بيدور على حاجه غير أمان وأكل اللي بيقول ده راجل أمي مش بيعرف يقرأ ويكتب، أستاذ صلاح مثال للإنسان الطبيعي، الإنسان اللي مش ثقافته ولا مركزه الاجتماعي هما اللي عملوه لكن إنسانيته ورحمته

الإحسان في أرقى أشكاله، النهارده كان من أجمل الايام اللي عدت عليه في حياتي علشان في حد جميل في الدنيا زي أستاذ صلاح