توريث الخوف

 

بقالي يومين بفكر ازاي شعبنا تدنى وعيه بشكل مخيف ، وازاي بشوف الاهالي اللي عجزت عن علاج مشاكلها النفسيه وتطوير نفسهم وقرروا انهم يتكاثروا ، كارثه على جميع الاصعده ، اطفال طالعه عاجزه انسانيا

هل بقى توريث الخوف شكل من اشكال الحب اللي بيقوله عليه ده اللي هو الاب و الام بيخافوا على عيالهم اكتر حد في الدنيا ، طيب انا هقولكم الاب والام اللي بيورث الخوف لعياله ما يعفش يعني ايه تربيه وميعرفش يعني ايه حب اصلا، هم اشخاص عجزوا عن حب انفسهم وبالتبعيه لا يستطيعون حب شخص آخر ده مش تكهنات شخصيه ده علم نفس.

فال الشخص العاجز عن الحب ده ينتج لنا جيل كامل لم يتلقى الحب بل تلقى التخويف من كل حاجه حواليه فيبقى عندنا طفل مشوه ما يعرفش يعني ايه حب بس يعرف يعني ايه خوف ويتعلم ان كل حاجه تخوفه يتخلص منها ايا كانت الطريقه مش مهم اذا كانت انسانيته بتنتزع منه مع كل فعل قبيح بيقوم بيه.

وطبعا احنا عارفين ان الضمير شئ مكتسب مش مولودين بيه وعلى حسب التربيه ينمو ضمير الطفل، لما يفتقد الاب والام للضمير مش هيكون عندهم القدره على تنميه الضمير لدى الطفل فيحصل اللي احنا فيه دلقتي حاليا أجيال جديده تفتقد الضمير و الوعي الانساني والحب

وده بالاضافه لمنظومه التعليم اللي مافيش داعي نتكلم عنها، في بدايه المدارس كان في بوليس واقف عند كل المدارس وقت الحضور والانصراف ولما سألت ليه قالولي علشان الاولاد بيتعرضوا للبنات في الشارع فعلا انت بجد 

طفل طالع متحرش أصلا وتشوف بقى الام والاب يقولك مافيش احسن من ولادي طيب هو حضرتك عارف هما بيعملوا ايه ، عيال يعني بكره يتعلموا. ده رد انا بسمعه كتير

الطفل شايف ابوه وهو بيكسر على العربيه اللي جنبه ومش بيستنى دوره وبيرمي الزباله في الشارع أب و أم مجوفين ثقافيا و انسانيا واجتماعيا يعلموا الاطفال القسوه و الكراهيه و الفساد فا الطفل من دول لما تقوله كده غلط او عيب او مايصحش كده ممكن يشتمك ويقل ادبه وما الى ذلك

الحقيقه الوضع اوقات يخلي الواحد ما يحسش بأمل في التغيير بس يمكن الشغل مع الاطفال يغير الوضع لو المنظومه التعليميه اتعملها تطهير من الفساد.