في زمن الاستنساخ

 

من كام اسبوع كده في حد كلمني من جمعيات حقوق الحيوان في القاهره علشان في شكوى من الكلاب في مدينه سفاجا.

المهم اتصلت بالشخص الشاكي وهو بيقول انه صحفي وبينقل صوت الناس وانه الناس عندها مشكله مع عدد الكلاب في الشوارع، حصل وحقيقي انه في زياده في اعداد الحيوانات بس ما هو في زياده في اعداد البشر كمان، ما هي اصلها دايره متكامله.

اختفى الاخ الصحفي بعد ما عمل المنشور على صفحته وحدثت البلبله، بعد ثلاثه اسابيع واضح انه كان في قصور في المشاركات على الصفحه قوم ايه يلا بينا نهيج الناس تاني على الكلاب وطبعا لآنه هو شخصه بيكره الكلاب ده على حسب قوله.

المهم ظهر طبعا العديد من المتطرفين اللي نادوا بالقضاء على الكلاب الضاله، الله هي الكلاب ديه ضاله من فين يعني هي كانت فين وضلت؟

في زمن الاستنساخ ادخل على اي منشور هتلاقي فيه استنساخ، فيه عطب في العقل، هتلاقي كل السيدات بيقولوا نفس الكلام، كل الرجاله بيقولوا نفس الكلام بنفس الطريقه، مافيش اختلاف مافيش تمييز بين شخص وآخر.

طلعت واحده بقى فلحوسه قالتلك ايه استنوا هنقلكم بالحرف قالت ايه:

حسبنا الله ونعم الوكيل في كل شخص قادر يمنع اذي الكلاب

و سايبها كدا

اغلب المناطق مليانه كلاب. و بتهاجم العيال و هم رايحين الدروس بدون سبب

اتقوا الله

عاوزين تشوفوا جمعيات الرفق بالحيوان

لكن الرفق بالعيال لأ ميصحش

لله الأمر

طيب هسآلكم سؤال واحد تفتكروا الست ديه بتآكل عيالها ايه، بتخلي عيالها يناموا الساعه كام، تعرف ايه عن صحه عيالها النفسيه؟ الاهالي بتاكل عيالها اكل يجيب كل الامراض اللي في الدنيا، العيال بتتفرج على حاجات ماينفعش تشوفها وبتسمع حاجات ماينفعش تسمعها، انا ما قابلتش طفل واحد في خلال السنه ديه اقدر اقول الله على الام اللي ربت بقول حاجه تانيه هحتفظ بيها لنفسي.

المهم يا استاذي يا ترى وانت ماشي بتعلم عيالك ما يرموش زباله في الشارع؟ يا ناس ده انا بروح البحر بكلابي بلاقي البامبرز مرمي على الشط، طيب الام المعفنه ديه هتطلعلنا جيل عامل ازاي؟

مستنسخات، اتنين قرروا يتجوزوا غير مؤهلين لاء عقليا ولا ثقافيا ولا اجتماعيا ويخلفوا، طبعا الصوره واضحه ولا ايه، مصر بتموت، علشان خاطر ربنا روحوا اتعالجوا واتعلموا وافهموا وبطلوا تخلفوا لغايه اما تبقوا مؤهلين ومسؤولين علشان الحال ينصلح.

وما ترموش زباله في الشارع يا معفنين والكلاب اعدادها هتقل لوحدها، بياكلوا زبالتكم يا معفنين، وبعدين ما تاكلوا على قدكم هو ايه كميات الزباله اللي بتنتجوها كل يوم ديه، يا اخي ده انا ابويه اللي قرب يتم ال ٨٠ ربنا يديله الصحه بياخد بواقي الاكل في اطباق يحطها للحيوانات في الشارع، انا بشكر ربنا اني طلعت في عيله علمتني الرحمه والحب وانه خلق ربنا لازم يحترم.

الكلام كتير بس كفايه عليكم كده النهارده.